Ang Manapla Port Management, Stevedoring and Arastre Corporation ang nag file sang reklamo batuk sa mga opisyales sang Land Bank of the Philippines sa Office of the Ombudsman Visayas sadtong Marso 5 may kaangtanan sa loan nila sa bangko nga wala ma release.
Nalakip sa ila nga gin pasakaan sang reklamo may angut sa pagsupak sang Anti-Graft and Corrupt Practices Act, section 3 paragraph e, False Testimony nga civil case kag Conduct Prejudicial to the Best Interest of Public Service amo kanday Ma Luisa Chiu, AVP/Head Negros Occidental North Lending Center, Renato Brillantes, CPA kag empleyado sang Landbank, Allan Bisnar, Vice President, Landbank Central Visayas kag Francisco Jubelag, loan officer sang Land Bank of the Philippines.
Suno sa abogado sang MPSA nga si Atty Rey Gorgonio, luyag nila sang hustisya bangud apesar sang pag comply sang MPSA sang tanan nga requirements para sa 180 million pesos nga loan wala natigayon release ang amo nga loan.
October 2023 naka baton na kuntani sang notice of loan approval ang MPSA. Pero nag expire na lamang ini wala gid na tigayon release ang loan.
Isa sa ila nga gina kwestion amo nga ginpangayuan ang MPSA sang Landbank sang foreshore lease agreement nga sandig sa notice of loan approval isa ka post release requirement.
Sang ginhinyo ini, wala pa man gani suno kay Gorgonio tigayon na release ang first tranche sang loan.
Dugang pa niya verbal man nga gin pangayuan sang 20 million pesos equity sang Land Bank ang MPSA nga wala man naka sulat sa pre-release requirement.
Pero ini ang gin-comply sa gihapon sang MPSA.
Bahin sa legal nga aspeto wala sila sang may nakita nga basehan para indi ma release ang loan.
Sa karon suno kay Dave Sarrosa sang MPSA, maga tinguha na lamang sila sa pag pangita sang iban nga bangko nga sarang sila maka loan.
Kag padayon nga maga operate ang puerto sa Manapla.
Gina paabot nga maga sugod ini operate Abril 5.
Isa ka major project ang port operation suno sa ila kag indi lamang sa patag sang ekonomiya ang gina lauman nga pagsanyog kundi pati man ang turismo kag iban pa nga aspeto.
Gintinguhaan sang Digicast Negros nga makuhaan sang bahin ang Land Bank.
Suno kay Chiu ila na nga ginpatuhoy sa ila nga legal department ang kaso kag as of press time wala pa man sila makabaton sang kopya sang reklamo nga na file sa Ombudsman.