Prayoridad sang Bacolod Traffic and Transportation Management Department nga mapanapikan sang safety check stickers ang may 1,200 ka mga traditional jeepney nga nagpa-consolidate kag kumpleto ang permits halin sa provisional authority, LTO kag LTFRB registration kag business permit.
Pero indi malipod nga may pila ka mga traditional jeepney operators kag drivers ang nagapamilit nga kuntani matapik man sa ila mga windshield ang stickers nga naga pamatuod nga insured ang ila ginabyahe nga jeep.
Ginpahayag ni BTAO head Patrick Lacson nga indi nila pwede matagaan sang stickers ang indi consolidated kag wala sang insurance nga mga traditional jeepney sa siudad.
Ginpaathag niya nga ang mga safety check stickers ang nagatuyo maghatag giya sa mga pasahero nga insured kag lehitimo ang pagbyahe sang mga traditional jeepney.
Ginsiling ni Jun Asis, chairperson sang Asenso Bacolod Cooperative nga mahimo nabiktima lang sang pagpatalang ang pila ka mga traditional jeepney operators kag drivers rason nga nagapangita sila karon sang pamaagi agud bisan paano maka-upod sa programa sang gobyerno bahin sa public utility vehicle modernization program.