Sa sulod sang 31 ka adlaw, dungan nga maga-training ang katapo sang 3rd Infantry Division sang Philippine Army sa Visayas kag ang Australian Defense Force.
Sakop sang 3ID, nga ang headquarters yara sa Jamindan, Capiz, amo ang mga isla sang Negros, Siquijor, Panay kag Guimaras.
Sa Camp Peralta sa Capiz ginapatigayon ang Philippine-Australia Army-to-Army Exercise (PAAAE) nga nagsugod sang Oktubre 8.
Ginatos ka mga soldado sang 3ID kag ADF ang dungan nga pagahanason ang ikasarang sa pag-gamit sang drones, bangka, kag nanari-sari nga defense weapon.
Paagi sa joint exercises kag trainings, ginatuyo ka militar sang Pilipinas kag Australia nga ila mapabaskog ang interoperability, tactical capabilities, military cooperation kag camaraderie sa tunga sang duha ka allied armies.
Ini ang ikaduha na nga joint exercises sang Philippine Army kag Australian Defense Force sini nga tuig. Ang una ginhiwat sa Mindanao.