Agud makabulig sa tion sang emerhensya, ginpatigayon sa Bacolod City Government Center ang Sagip-CPR kun sa diin masobra sa 700 ka mga indibidwal lakip na ang mga Persons With Disabilities, Senior Citizens, kag Solo Parents ang gintudluan sang basic life support.
Ginpangunahan sang Department of Social Services and Development ang programa kaupod ang isa ka pharmaceutical company nga nagtudlo sa mga participants kun paano mag CPR.
Ginsiling ni Alma Gustilo, Assistant Head sang DSSD nga target sang programa nga mahatagan sang ihibalo kag hands-on training ang mga nagkalain-lain nga sektor agud ila man ini magamit sa tion sang mga emerhensya.
Iban sa mga participants ang may yara na sang mga first-hand experience nga nagtaliwan ang ila nga himata bangud wala sang may nakahibalo sa ila mag CPR, gani ini man ang nagtulod sa ila nga magtuon sang basic life support.
Dugang ni Gustilo, dako ini nga bulig para sa sektor sang PWD nga masami wala nagakahatagan sang tyansa sa amo nga training.
Suno kay Dr. Joel Yap, isa ka cardiologist, dako ang pulos sang CPR trainings bangud ini lamang ang pamaagi agud masalbar ang kabuhi sang isa ka tawo samtang wala makaabot ang rescue. Tatlo lang kaminuto suno sa iya nga wala sang oxygen ang pasyente, nagakapatay na ang braincells sini, rason nga importante ang pagtuon sang CPR.
[sibwp_form id=1]