Lunes, Hunyo 15, ginpadayon ang clearing operation sa lugar sa Sitio Kabalagnan, Barangay Lalong sa Calatrava kung diin nagbayluhanay sang lupok ang katapo sang Regional Mobile Force Battalion kag gin-alegar New People’s Army, Domingo sang hapon, Hunyo 14.
Papapuli na ang walo ka personnel sang 1st Platoon, 2nd Maneuver Company matapos ang ginpatigayon nga barangay visitation sang ila maka-engkwentro ang kapin 10 ka mga rebelde.
Madasig naman nga naka-augment ang Quick Reaction Team sang 2nd Maneuver Company kag na-extract ang operating team sa area.
Ginsiling ni Police Capt. Jesus Alba, luwas sa katalagman kag na-account ang tanan nga personnel sang Regional Mobile Force.
Nakuha sa encounter site ang isa ka naguba nga caliber 5.56 rifle, base sa report sang pulis.
Makabig ang area nga infiltrated sang mga rebelde suno sa hepe bangud may duha ka mga residente sang Brgy. Lalong ang nadala sa 19 ka mga napatay sadto sa engkwento sa Brgy. Salamanca sa banwa sang Toboso tinalikdan nga Abril 19.
Nagpanawagan naman ang barangay captain sang Brgy. Lalong nga si Roel Llagano sa mga armado nga untatan na ang kalakasan bangud sa trauma nga ginahatag sini sa mga pumuluyo.*
[sibwp_form id=1]