Base sa pinaka ulihi nga update sang Department of Health Region 6, may 13,915 na tanan ka mga health care workers sa Western Visayas nga nabakanuhan kontra COVID-19.
158 sa ila ang nagbatyag sang adverse side effects gani gindala sa ospital. 148 diri ang may mild events kag may napulo nga serious events pero tanan sila sa karon ang nakagwa na sa ospital.
Suno sa DOH, normal lamang ini nga epekto sang bakuna sa pila ka mga persona kag indi dapat nga ikahangawa.
“But we are happy nga ang tanan nga 158 naton ka adverse event following immunization sa COVID-19 were all discharged alive and ambulatory so these are just minor lang gid katama nga mga symptoms compared sa posible nila nga ma experyensyahan kun sila matapuan gid sang tuod tuod nga covid-19 virus naton,” suno kay Dr. Mary Jane Roches Juanico, head, Infectious Disease Cluster sang DOH WV–CHD.
Sa Bacolod City, may trese ka mga medical frontliners nga ginbakunahan sang AstraZeneca sang Sabado.
Subong nga adlaw ang roll out sang astrazeneca sa mga ospital sa siudad para sa mga senior citizens nga health care workers.
Naubos na sang siudad bakuna ang nahauna nga batch sang Sinovac nga 2,350 doses.
May dugang nga 3,430 ka mga doses sang Sinovac nga nabaton ang Bacolod gikan sa doh sang Sabado.
“Ti ang Saturday nga nag abot nga Sinovac subong pa lang namon sugudan ang roll out para naman na ya sa mga isolation facility, sa mga city health office naton nga mga health care workers, sa aton nga mga BHW, subong nagasugod ang roll out diri sa NGC,” suno kay Dr. Chris Sorongon, deputy for medical data and analysis, Bacolod EOC.
Sang Sabado, may nabaton man ang Bacolod nga 840 ka vials sa Coronavac nga gindevelop man sang Chinese company nga naghimo sang Sinovac.
May dugang pa gid nga supply sang bakuna nga ginapaabot ang Bacolod gikan sa DOH.