Inoras antes magsugod ang ika-lima nga State of the Nation Address ukon SONA ni President Ferdinand Marcos Jr., isa ka aksyon protesta ang ginpatigayon sang nagkalain-lain nga mga grupo sa siudad sang Bacolod.
Humalin sa South Capitol Road padulong sa Bacolod City Government Center replica sa Public Plaza, nagasinggitan ang mga rallyista sa mga butang nga ila gusto mabatian sa SONA sang presidente.
Ginsiling ni Noly Rosales, Secretary General sang BAYAN Negros, nga kinahanglan nga masolusyonan sang presidente ang nagasaka nga unemployment rate sa pungsod kag amo man ang pagsaka sang mga presyo sang balaklon, kuryente kag gatong.
Isa man sa mga ginasinggit sang mga nagkalain-lain nga grupo amo ang pagpamatuk sa Pax Silica, isa ka international coalition nga ginapangunahan sang pungsod America may angut sa pag-sustain sang Artificial Intelligence.
Suno kay Rosales, ang pagpatukod sang infrastructure sa 1,600 hectare nga duta sa Tarlac para sa amo nga proyekto ang makaguba sa dunang manggad kag posible nga madulaan man sang palangabuhian ang pila ka mga mangunguma sa amo nga lugar.
Panawagan naman sang grupo sang mga mangunguma amo nga kuntani mahatagan sang presidente solusyon ang RSSI ukon peste sa katubuhan sa Negros.
Dugang naman ni Fr. Arman Onion, convenor sang One Negros Ecumenical Coalition, kinahanglan nga manabat ang presidente kag si Bise Presidente Sara Duterte sa mga nagakatabo sa karun nga mga isyu sa pungsod.
Sandig sa report sang kapulisan, indi magnubo sa 2,000 ka persona ang nagpakigbahin sa marcha gikan sa South Capitol Road padulong sa Bacolod City Public Plaza samtang yara nalang sa 300 tubtob 500 ang nagtambong sa isa rally sa plaza.
Sa SONA sini nga hapon, una nga gintalakay ni PBBM ang natalana pagpasaka sang kaso batuk sa iya pakaisa nga si former house speaker Martin Romualdez may angut sa kontrobersyal nga flood control projects.
Suno sa iya, nagaserbe siya nga presidente sang pungsod kag indi sang iya nga pamilya kag himata.
Gintalakay man sang presidente ang mga programa sang gobyerno bilang solusyon sa padayon nga pagsaka sang presyo sang gatong.
[sibwp_form id=1]