Matapos nga nagbinalik ang mga nagaistar sa kilid sang 4th Street corner Lacson sa Bacolod City, Biyernes sang aga liwat nga ginpahalin sang Bacolod City Mendicancy Management Division kag City Legal Office sila kag ginlimpyohan ang lugar.
Makapila na ka beses nga ginpahalin ang mga naga-istar diri kag ginpangkakas naman ang mga hayub-hayub nila, apang nagabalik man sila sa gihapon. Suno sa Department of Social Services and Development, yara sa amo nga lugar ang palangabuhian nila bangud nagapanglimus kag nagapaatras sang mga salakyan sang mga customer sang fastfood chains sila.
Ginpangdala nalang sang CLO ang mga pagkabutang nga nabilin sang mga naga-istar diri, lakip na ang ila mga hiligdaan, mga karton, kag mga lamesa agud masiguro nga indi na sila magbalik pa.
Suno sa program head sang Mendicancy Management Division nga si Anjanette Servano, padayon nila nga iga-monitor ang ini nga lugar agud mapabilin ang katinlo kag kahilway.
Liwat man nga ginpangabay sang siudad ang mga opisyal sang barangay nga mas mangin hugot sa pagpatuman sang mga laye agud malimpyohan ang mga public spaces.
[sibwp_form id=1]