Ginapa-usisa karon sang pamunuan sang 3rd Infantry Division sang Philippine Army ang nagluntad nga pagpamahog sang gin-alegar katapo sang Citizen Armed Force Geographical Unit sa isa ka pamilya sang mangunguma sa Hacienda Louisa, sakop sang Barangay Ma-ao, sa Bago City sang Lunes.
Ginsiling sang tagreklamo nga si alyas “Angelina”, mga pito ka armado nga lalaki ang nagpadulong sa ila lugar kag nagpakilala nga CAFGU.
Suno kay “Angelina”, nag-alegar ang armado nga lalaki nga sila ang gintawgan sang enkargado nga naga-claim sa duta agud mag-assist. Nahibaluan nga madugay na nga naga-istar ang mga pumuluyo sa lugar.
Mabatian sa video nga gin-upload online nga naghambal ang isa ka armado nga sila ang nagapatunga lang agud nga wala sang matabo nga kinagamo.
Sang nagmando ang lalaki nga pang gabuton ang mga tanom, nagsabat sa iya ang isa ka pumuluyo, kag didto na nakabuya sang mga malain nga tinaga ang lalaki kag nagpamahog nga ubuson niya ang pamilya.
Sa karon, napang-gabot na sang mga pumuluyo ang tanan nga tanom, kalabanan ulotanon.
Ginpahayag sang 3ID nga wala nila ginatolerar ang ano man nga sahi sang pagpamahog kag intimidation sa mga sibilyan.
[sibwp_form id=1]