Sang nagligad nga semana, may masobra sa napulo ka mga manunudlo gikan sa San Carlos city kag banwa sang Calatrava ang nagpadulong sa PNP para magpasaka sang reklamo batuk sa isa ka persona nga ila gina alegar nagpanginto sa ila.
Suno sa hepe sang San Carlos PNP nga si Police Major Mark Junco, ginpasalig ang mga tagreklamo sang dako nga balik sang kwarta nga ila gin-invest pero wala gid ini natuman.
Ginahanda pa karon sang PNP ang kaso nga Estafa nga ipasaka batuk sa suspect bangud may mga nagatuhaw pa nga dugang nga mga tagreklamo.
“May ara 200 thousand, may ara 500 thousand, may ara 300 thousand, may ara 100 thousand. daw networking guro gihapon nga sistema guro,” suno kay Junco.
Nagapaandam ang Securities and Exchange Commission sa publiko batuk sa pag invest sa mga grupo ukon kumbuyahan nga wala na-register sa ila talatapan.
Wala nagakasayuran nga kun registered sa SEC sarang na ini makakuha sang investment gikan sa publiko.
Suno sa information officer sang SEC Bacolod Extension Office nga si Clyde Pinaja-Padilla, dapat maghalong sa mga networking scheme ilabi na ang mga wala sang produkto kundi kwarta lamang ang gina invest kag kwarta man ang gina promisa nga ibalik.
“ang ginabayad nila nga kuno abi ginansya or return of investment amo man ang kwarta nga gin invest nimo so gina rolling-rolling lang na so abi ako ang first round nga ma-invest tapos tagaan ako da nila commission kuno tapos may ikaduha naman nga set sang tawo nga mag-invest ang ikwaon da nila nga commission didto man lang na sa kwarta nga gin invest mo kay ti wala man sila sang produkto nga ginahatag sa tawo”, suno kay Padilla
Gnasaulog karon sang SEC ang Investor Protection Week nga may tinutuyo sa paghatag sang ihibalo sa publiko kun paano indi mabiktima sang nanari-sari nga klase sang investment scam.
May pagahiwaton nga libre nga webinar ang ahensya sa maabot nga Miyerkules may angut sa ini nga topiko.
Magkadto lang sa official Facebook page sang SEC para mahibaluan kun paano magpa rehistro.