Governor Eugenio Jose Lacson ang naga haylo sa mga banwa kag siudad nga mag solarize labi na sa mga government buildings sini.
Ang panawagan gin-isyu sang gobernador sa tunga sang pagsaulog karon sang Renewable Energy Week nga nagbukas kaina kag magalawig tubtob sa Mayo 24.
Mangin tuigan na ini nga kahiwatan. Suno kay Lacson, kadungan sa Renewable Energy Week ang pag patuman sang exhibit kun sa diin sarang maka pa kig-angut ang tagsa ka LGU para sa mga produkto nga ginatanyag sini nga makabulig sa ila sa pag solarize sang ila nga mga government buildings.
Damlag pa ginsiling na sang gobernador nga ang pito nga ka mga building sang probinsya ang maga shift sa solar energy kag ang bidding natalana sa third quarter sini nga tuig.
Gina paabot ang 1.5 tubtob 1.8 million pesos ang mangin savings sang probinsya sa amo nga tikang.
Gina suportahan naman ni Victorias City Mayor Javi Benitez nga presidente sang Negros Association of Chief Executives ang amo nga tikang sang probinsya.
Suno sa iya ang iga tukod sang Government Center sang Victorias ang maga gamit sang canopy type solar powered roofs.
Gindayaw naman sang Department of Energy ang probinsya bilang isa sa mga naga panguna nga naga duso sang Renewable Energy agudto mapamatukan ang climate change kag tigayon maka angkon sang seguridad sa enerhiya.