Animal bite cases sa Bacolod nagsaka sa 50 porsiento sandig sa record sang City Health Office. Masami nagakahubsan sang bakuna para sa anti-rabies ang Bacolod City Health Office tuga sang pagsaka sang animal bite cases sa siudad.
Sa record sang CHO, naglab-ot sa masobra 9,000 ang animal bite cases sang 2022.
Gulpi ini nagtimbook sa masobra 14,000 ka kaso sang 2023. Ginsiling ni Dr. Carlo Ortega sang Bacolod -CHO may nag-inabot na nga dugang nga supply sang bakuna sang Enero. Ugaling limitado lang ang libre nga bakuna sa mga severe cases sang animal bites.
Ginpahayag ni Assistant City Veterinarian Dr. Jec Cabuguason nga posible pa magsaka ang kadamuon sang animal bite bangud magluwas sang masupog nga kampanya kontra sa rabies nagadamo man ang mga nagasagod sang hinuptanan, ilabi na sang nagsugod ang pandemic.
Samtang ginpahayag ni Cabuguason nga sa karon nagapadayon ang massive anti-rabies vaccination sa mga hinuptanan nga ido kag kuring sa mga kabarangayan agud malab-ot ang 70 percent nga herd immunity.
Sa data sang City Vet, nagalab-ot sa masobra 100,000 ang kadamuon sang mga ido kag kuring sa siudad nalakip na diri ang mga layaw nga ila gina-tinguhaan mabakunahan.