Ang malinong nga Providence Negros nga subdivision sa Barangay Granada sa Bacolod ang ginkibot na lang sang kahapon sang makita sang mga residente pati na sang gwardiya sang subdivision nga may mga patay na nga mga ido kag isa ka kuring sa dalan sang kahapon.
Sa sini nga dalan sa sulod sang subdivision naabtan pa sang Digicast Negros ang ini nga patay nga ido nga nasulod sa plastic kag gina langawan.
Suno sa isa sa mga residente nasal-an sang iya misis nga ila ang ido nga napatay gani ila ini gilayon nga ginsulod sa plastic pero nakibot sila sang makit-an nga buhi gali ang ila nga ido.
Ginahulat nila nga makuha sang basurero ang patay nga sapat.
Sa sini naman nga kalye naabtan pa gid sang digicast negros nga may patay man nga ido sa higad sang dalan.
Sa block ten suno sa mga residente may duha ka mga ido kag isa ka kuring sila nga nasapwan nga patay man sa dalan.
Suno sa gwardiya sang subdivision, may anum tanan ka mga patay nga ido nga nakit-an kag isa ka kuring.
Ang isa diri ka ido nakita pa sang isa man ka gwardiya nga naga dalagan pa kag naga bura ang baba antes natumba.
Samtang naga istorya ang gwardiya may isa ka residente nga naglabay kag nagreklamo sa nga dapat ipahimos na ang patay nga mga ido kay naga panimaho na
Nag promisa ang gwardiya nga mangita na lang anay sang trisikad driver nga amo ang makuha sang patay nga mga sapat kay indi niya man mabayaan ang iya pwesto. Weekend lang kuno naga sulod diri ang basurero.
Indi ini ang nahauna nga tiun nga natabo ang gina alegar pagpanghilo sang mga sapat
Pero suno sa gwardiya posible nga residente man ang nagpang hilo sa sapat pero ila pa ini nga gina usisa.
Ang grupo nga Community Animal Rescue Efforts ukon care ang na alarma sa sini nga insidente. Nagpagwa sang statement ang grupo nga animal cruelty ang natabo kag indi ini solusyon sa naga damo nga layaw nga sapat.
Gina panawagan man nila ang atensyon sang barangay kag lgu nga nga tani makilala
Ang sa likod sang brutal nga pagpamatay sang sapat nga makabig isa ka krimen.
Handa sila maghatag sang reward sa maka hatag sang impormasyon sa kun sino ang sa likod sa pagpang hilo sang sapat.