Ginsaysay sa Digicast Negros sang isa sa mga babaye nga naka quarantine sa karon sa Sum-ag National High School nga ginhimo isa sa mga quarantine facilities sang siudad sang Bacolod.
Suno sa iya, ila nalang ginkakibot sang nagpanugid sa ila ang upod nila sa kwarto nga may nakit-an ini nga naglingling sa iya samtang siya ang nagapaligo sa sulod sang banyo.
“Nagsaka di siya nga nagatampi lang siya and then naghibi siya sa amon gakurog-kurog siya kag naghibi siya nga may nakita siya nga may nagling ling sa iya or may naglili sa iya sa CR.”
Gilayon nila nga ginlantaw ang bintana sang banyo kun sa diin nakit-an ang nagapangling-ling.
Ila nakit-an ang isa ka cable reel nga kahoy kag basurahan nga amo ang posible gingamit sang suspect sa pagtungtung para makalab-ot sa bintana sang banyo.
Ginadudahan nila ang isa sa mga utility sang quarantine facility nga amo ang may kahilabtanan sa insidente.
“As in gasala sala siya tapos siya ang naghimos sang gintungtungan to kung sino man to ang nagtuntung didto siya na ang naghimos ang suspect namon dali-dali niya himos hambal sang mga upod ko indi anay paghimusa kay picturan namon wala gid ya ginhimos niya gid ya tapos daw gasala sala siya bala kun ano himuon niya.”
Ila ginpadangat ang insidente sa in charge sa facility pero ila ginpahayag nga wala ini nahatagan sang pagtamud.
Sini nga hapon, nagkadto si Bacolod Councilor Renecito Novero para mag usisa.
“I will investigate, i will try to see what we can possibly do at least kun wala may mag admiter mabal-an nila nga ginatagaan ta attention mapauntat naman lang dayun mahadlukan naman lang ang nagahimo sina magliwat,” suno kay Novero.
Luyag naman masiguro sang mga tagreklamo nga indi na ini matabo liwat sa iban pa nga mga nagatenir sa amo nga quarantine facility gani dapat hatagan sang nagakaigo nga tikang.