Pasado las nuebe sang aga, naga idas ang mga empleyado, abugado, judges, mga pulis pati na ang may mga kaso sa gwa sang Hall of Justice sa Bacolod.
May mga pulis sa gwa sang building kag may mga katapo sang explosive ordnance disposal kag K9 unit sa sulod sang compound nga nagalibot.
Suno sa isa sa mga abugado nga may hearing kun tani sa sulod nga si Atty. Andrei Norman Saril, antes pa lang mag las otso y media sang aga gin abisuhan na sila nga magwa anay sa building.
Nagtinir sa gwa sang building ang tanan kag naghulat samtang gina usoy pa sang EOD kag PNP ang sulod.
Pati manug deliver sang pagkaon sa mga empleyado ang apektado sa temporary suspension sang trabaho sa Hall of Justice.
Ang ini nga babaye nag agaw eksena sang nag insister sa gwardiya nga mag sulod. Sang ginpamangkot kun ma ano siya….
Nag inamat amat naman ginuha ang mga salakyan nga naga parking sa sulod.
Las diyes kinse, nag announce ang gwardiya sa gate nga kutob sa mga empleyado ang pwde na maka sulod sa building.
Suno sa kay Lt. Andy Ofalia, officer in charge sang Police Station 2, may lalaki nga nanawag sa public attorneys office kag nag abiso sa mga empleyado nga magwa sa building kay may bomba.
Naglawig sang halos isa ka oras ang pag usoy sang katapo sang eod sa sulod sang building bangud may mga gin pang isa isa pa sila nga mga karton sa sulod.
Ginsiling sang PNP nga false alarm lang ang bomb threat pero ang iban sa mga hearing ang gin pang reset na bangud halos duha ka oras nga suspendido ang operation sang Hall of Justice bangud lang sa pang sasko. Pero may mga numero na sang mga nagtawag sa korte nga nakuha kag ila na ini gina pang usisa.