Wala makaluwas sa kay Bacolod City Mayor Albee Benitez ang gision nga flag sa Bacolod City Government Center kaina sang aga.
Gintawag sang alkalde ang atensyon sang natungdan nga departamento sang iya nakita ang gision nga hayahay sang Pilipinas kaina sang aga sa flag raising ceremony.
Para sa alkalde naga pakita lamang ini kun paano gina halongan ang mga butang sang siudad bisan sa gagmay nga bagay.
May nagsiling sa iya nga wala makita ang gisi kay napilo ini pero sang ginpamangkot niya ang mga empleyado mismo kun bala sang nagligad pa ini nga semana, oo ang sabat sang mga empleyado.
Gin laygayan sang alkalde ang tanan nga kun may makita gani nga sala indi na maghulat pa sang mando gikan sa alkalde para mag giho.
Gilayon niya nga ginmando ang pagkakas kag pag ilis sa hayahay.
Matapos ang programa gilayon nga ginkakas ang gision nga flag kag gin islan sang bag-o.