Humalin sang natukod ang subdivision sa Barangay Estefania nangin palaligban na sang pila ka mga residente sang Purok Villar sakop sang Barangay Mandalagan ang tubig baha nga naga-awas pakadto sa ila mga balay.
Karon nga nasuguran na ang kaiping nga development project sang Rockwell Land Corporation mas naglibog na gid ang ulo sang mga pumuluyo ilabi na nga sa ila lugar nagalab-ot ang tubig baha.
Ang ginalain pa sang buot sang mga residente nga kalabanan sa ila mga CLOA holders kay wala man naglisensya ukon nag-negosyar sa ila ang developer pati na ang barangay para sa drainage project nga nasakpan sang ila nga duta.
Pila sa mga residente nagaplano nga tabunan ang tamburong kun diin naga-awas ang tubig baha nga halin sa gina-develop nga real estate project.
Tungod sini nagpasalig si Mayor Albee Benitez nga magahinun-anon sa Rockwell sa tuyo nga matagaan sang kasolbaran ang problema ilabi na karon nga tig-ululan.