Liwat nga ginlibot sang City Price Monitoring Team ang pila ka mga gasolinahan sa Bacolod City matapos nga may pila ka reklamo nga nabaton ang siudad tuhoy sa indi pag-comply sang mga gas stations sa rollback nga gin-anunsyo sang Department of Energy.
Sandig sa ila nga pag pangusisa, may mga gasolinahan nga wala gid man nag sunod sa rollback sang DOE.
Ginsiling ni Bacolod City Administrator Atty. Mark Steven Mayo, may tatlo ka branch sang isa ka dako nga oil company ang 12 pesos naman ang roll back nga ginpatuman sa gasolina, apisar sa masobra sa 16 pesos nga gin-anunsyo sang DOE.
May iban naman nga mga gasolinahan ang nagsiling nga out of stock na ang ila baligya nga gasolina.
Suno kay Mayo, ila na gin-report sa DOE ang resulta sang ila monitoring sa Bacolod City agud mahatagan ini sang nagakaigo nga solusyon.
Samtang, nag pangabay naman ang Sangguniang Panlungsod sang Bacolod City sa DOE kag DTI nga pabaskugon sang mga ahensya ang ila monitoring sa presyo sang gatong agud hugot nga mapatuman ang mga rollback.
Wala man sang kapasidad ang siudad nga magpasira sang mga gas stations kun indi ini magsunod sa ginapatuman sang rollback sang DOE.
“Kay kun saka gani makita naton, kadasig sa ila magpasaka. Kun rollback gani, either wala stock or gadugay or ga sira sila kay tungod nga according to them there is no available stocks. So that is I think unfair sa aton mga motorista”, suno kay Distrito.
[sibwp_form id=1]