Nagapabilin pa sa red alert status ang Bacolod City Veterinary Office para sa hugot nga pagbantay sang mga kaso sang African Swine Fever sa siudad.
Ginsiling ni Assistant City Veterinarian Dr. Janine Sarthou nga sang ginpatigayon nga random sampling sa mga baboy, may isa ka baboy nga yara na kuntani sa slaughterhouse ang nagpositibo sa ASF.
Bangud sini, mas ginpahugot ang pag monitor sang mga ilihawon nga baboy sa slaughterhouse agud malikawan nga mabaligya ang mga baboy nga apekto sang amo nga balatian.
Suno kay Sarthou, humalin Hunyo 30, tubtob subong nga adlaw may masobra na sa 20 ka mga baboy ang ila na test, kag kalabanan diri ang nag negatibo man.
Una na nga ginsiling sang CVO nga may duha ka baboy sa Alijis kag duha man sa Taculing ang nagpositibo sa ASF.
Gilayon nga gin cordone sang siudad ang 500 meter radius sa palibot sang tangkal nga ginatiniran sang amo nga baboy, apang nag negatibo man sa ASF ang mga baboy sa palibot suno kay Sarthou.
Ginahatagan sa karon sang daku nga pagtamud ang pag patigayon sang random testing sa mga Barangay nga may reported hog deaths.
Gin-ako man ni Sarthou nga may kabudlyan sila sa pag test sa mga backyard hog raisers bangud nagapamalibad ang mga ini nga mag kooperar.
Samtang, wala pa sa gihapon mapatuman ang border control sa mga entry points sang siudad.
[sibwp_form id=1]