Humalin sang nagligad pa nga sinemana masako ang pagbayo ni Jonard Dela Cruz sang mga natipon nga mga tukiba sang itlog.
Iya ini ginapudpod bilang kabahin sa mga materyal sa paghimu sang MassKara souvenir items.
Pati botelya ang iya ginapudpod kag mauti nga ginatapik sa mga ginahimu niya nga masskara headdress.
Istorya ni Jonard, duha man ka tuig nga wala siya makabaligya sang iya mga produkto bangud sang Covid-19 pandemic. Pero maayo lang suno sa iya nga natagaan siya sang oportunidad nga magtrabaho bilang job order casual sang siudad.
Mga gintunaw nga plastic cups kag mga balahibo sang manok nga ginatipon ni Jonard halin sa bulangan ang pila lang sa mga ginagamit niya para indi man siya matam-an sa ginagasto nga materyales.
Masobra kinyentos ka mga souvenir items ang target nga mahuman kag mapaubos ni Jonard sa tion sang MassKara Festival nga magasugod sa Oktubre 1.
Gani pati ang iya mga kabataan ang nagabinuligay sa pag ubra sang mga headress kag MassKara ref magnet.
Ang iya anak nga si Krisna masami ang kaupod ni Jonard sa pagbaligya sang mga MassKara items sa kilid sang Bacolod public plaza.
Indi lang sa tion sang MassKara Festival nagabaligya ang pamilya Dela Cruz. Liwat man sila nga magapangayaw sa pila pa ka mga probinsya para mag negosyo karon nga pwede na ang pagsaulog sang mga tuigan nga selebrasyon.