Masobra sa tres mil ka mga health workers sa Bacolod City ang natalana nga pagabakunahan sang Sinovac vaccine nga magaabot sa siudad subong ukon bwas nga adlaw.
Ginpahayag sang deputy for medical sang Bacolod Emergency Operations Center nga si Dr. Chris Sorongon nga 1,642 ka health frontliners sa Corazon Locsin Montelibano Memorial Regional Hospital ang pagabakunahan samtang 1,493 naman ang magagikan sa Riverside Medical Center.
Ini bangud ginakabig sila sang Department of Health nga level 3 COVID-19 referral facilities sa pampubliko kag pribado nga sektor.
Natalana sila nga pagabakunahan sa Domingo.
Pero may ginhanda man ang Bacolod EOC nga quick substitution list sang mga mahimo dapatan sang bakuna sa tion nga indi maubos ukon may sobra nga dose sa nag abot nga bakuna.
Ini bangud may iban nga health workers nga nagapili sang iban nga brand sang bakuna kag indi luyag sang Sinovac.
Suno kay Sorongon, indi man mandatory ang pagpabakuna gani indi sarang mapilit ang mga health workers.
Samtang, subong nga adlaw man maga abot sa Pilipinas ang bakuna gikan sa Astrazeneca pero wala pa nalakip diri ang 650,000 doses nga damlag pa gin order sang siudad sang Bacolod.