Mas barato nga utan kag sea food products ginapaabot paagi sa digital platform.
Kabahin na ang Bacolod LGU sa mga nangin partner sang Agro-Digital PH, isa ka digital platform nga nagatuyo magbulig sa mga local farmers para mapabaskog ang ila produksyon kag mapaayo ang ila nga income.
Resulta sini ang ginapaabot nga pagnubo sang presyo sang utan kag iban pa nga agri-fishery products sa mga merkado.
Paathag ni Councilor Thaddy Sayson, pamuno sang Committee on Agriculture sang konseho, nga paagi sa digital platform indi na kinahanglan pa ang mga middleman bangud sarang nga mapalab-ot sang mga mangunguma ang ila mga ani direkta sa mga merkado.
Kahapon ginlunsar na sang City Agriculture Office ang agri-fishery digital platform program sa Gaisano Grand City Central Mall Supermarket.
Ang digital platform ang kabahin sa mga ginaduso ni Mayor Albee Benitez sa idalom sang food security program para masiguro ang dekalidad nga produkto sang mga local farmers nga mabakal sa masarangan nga presyo.