Mga tenants sang Manokan Country gintagaan ultimatum agud magdesisyon kun masaylo ukon indi sa temporaryo nga pasilidad sang SM.
Bisan pa nagapang indi ang mga tenants nga magsaylo sa natukod nga temporary facility sang SM Primeholdings incorporated, magahatag gihapon sang deadline ang Bacolod LGU para sa ila agud magdesisyon kun magbaligya pa sila ukon indi.
Ginpahayag ni City Legal OFficer Atty. Romeo Carlos Ting Jr., nga kutob Hunyo 20 ang ultimatum nga ila ginhatag sa mga tenants para mapat-ud kun luyag nila magsaylo sa pasilidad nga yara lang sa atubang sang daan nga Manokan Country.
Libre ang arkila sa sulod sang 18 ka bulan samtang ginasuguran sang SMPHI ang pagdevelop sang bag-o nga Manokan nga ila pagasayluhan.
Ang City Legal Office ang nagpadala na sang notice to vacate sa 26 ka mga tenants.
Pero 19 sa ila ang nagpamalibad sa pagbaton sang notices.
Hulyo 5 ang ginhatag sa iya nga deadline para magbiya sa Manokan.