Anum ka mga commercial establishment sa Bacolod City, nalakip diri ang ginareklamo nga baligyaan litson sa Barangay Villamonte ang ginpasirad-an.
Wala na maka-operate ang ginareklamo nga baligyaan litson sa kilid sang dalan Burgos sa Barangay Villamonte sang ginserbe sang katapo sang City Legal Office Integrated Task Force ang closure order batuk sa ila kaina sang aga.
Pati ang lima ka malapit nga baligyaan, nalakip diri mga food stall kag kalan-an ang wala na magbukas makaligad nga ginpaandaman sang siudad.
Ginpahayag ni City Legal Officer Atty. Romeo Carlos Ting, Jr., lunsay wala sang mga businsess permit ang mga commercial establishment gani ini ang ginpasirad-an.
Kabahin ini sang pag-akto sang Bacolod LGU sa nangin reklamo ni anay councilor Ricardo Tan batuk baligyaan litson nga ginakabig iligal structure sa private road lots nga malapit sa iya ginapanag-iyahan nga townhouse.
Ang anay konsehal ang nagpasaka na sang kaso kriminal kag administratibo batuk sa 3 ka mga department heads kag pati na city fire marshall sang Bacolod-BFP bangud naka-operate sadto kag wala makakas ang ginareklamo nga illegal structure.