Patay ang 60-anyos nga mangunguma matapos gintiro sa Purok 1, Barangay Yao-Yao sa banwa sang Cauayan, Negros Occidental, mga las 5:40 sang aga, sadtong Domingo.
Nagwa sa imbestigasyon nga bag-o lang nakabugtaw ang biktima nga si alyas “Atan” kag manamog kuntani ini sang baboy sa likod sang ila balay.
Apang lipod sa iya ihibalo, may nagahulat na didto nga kapin lima ka mga armado kag siya ang gintiro sang makapila ka beses.
Pulo ka basiyo sang M-16 kag AK-47 ang nakuha sa crime scene.
Isa sa mga ginalantaw sang PNP nga posible may koneksyon sa krimen sa kaso nga acts of lasciviousness nga ginpasaka batok sa biktima.
Ginsiling ni Police Lt. Col. Norberto Barniso, hepe sang Cauayan PNP, sadtong January 5, 2024 nagwa kag gin-serve ang warrant of arrest sang biktima sa nasambit nga kaso.
Na-priso sang duha ka bulan ang biktima kag nakagwa matapos sini gin-areglo ang complainant.
[sibwp_form id=1]