Mga nagkalamatay bangud sang kalakasan sang rebeldeng NPA sini nga 2023 ang nagsaka masobra sa doble kun ipaanggid sa datus sang 2022.
Sang 2022, 11 ang yara sa listahan nga nagkalamatay bangud sang pag pangamot kag gina alegar pag pangamot sang NPA. Pero sang 2023, humalin Enero tubtob August 9 pa lamang, 27 ang gin pamatay kag gina alegar pamatay sang NPA.
Sobra sa doble ang ginsaka sa datus ukon 145 percent.
Ini apesar sang gina siling sang militar nga sa anum ka mga guerilla front nga naga operate sa Negros, tatlo diri ang dismantled na kag duha naman ang naghuyang na.
Sa sining 3rd Quarter gina bulubanta 53 na lamang ang manpower sang rebeldeng NPA kag 197 naman ang ila nga armas luthang suno sa miltar.
Paathag ni B/Gen Orlando Edralin ang pamuno sang 303rd Infrantry Brigade sang Philippine Army, ang pagsaka sa kalakasan, kabahin sang propaganda sang NPA para magpabatyag nga sila ang yara pa.
Dugang pa ni Edralin, nagsaka man ang kadamuon sang nagkalamatay bangud may purging man ukon gina tinluan sang rebelde ang ila nga hanay.
Target man sang NPA ang mga asset kag ally sang gobyerno.
Padayon man ang panawagan sa pagbalik sa sabak sang gobyerno, pero suno kay Edralin, pabaskugon pa gid sang militar ang ila operation kag intelligence gathering.