Wala na matabangan sa ospital ang mag live in partner nga sanday Arnel Calalas kag Jessa Laranio matapos maka bunggo sa nag parking nga truck ang ila nga motor sang Dominggo sang gab-i sa Barangay Pandanon sa banwa sang Murcia.
Ang ila anak nga menor de edad ang nag angkun man sa kapilasan bangud sang pag bunggo.
Suno sa Murcia PNP, naga dalagan ang motorsiklo kun sa diin sakay ang mag live in partner kag ila anak sa bahin sang dalan sa Hacienda Manuel Kho sang sila ang maka bunggo sa truck nga naga park.
Dead on arrival sa ospital ang mag live in partner samtang minor injuries lang ang naangkun sang ila anak.
Gin detain man sa Murcia PNP ang driver sang truck nga nag surrender sa kapulisan.
Samtang kagab-i, pilason naman ang mag live in partner nga sanday Gilbert Pahayahay kag Charmaine Sumicad matapos maka bunggo sa jeep sa dalom sang flyover sa Barangay Bata.
Suno sa traffice investigator, gikan sa flyover ang jeep kag sa pag panaog, ini ang gilayon nag left turn sa unhan sang flyover nga indi dapat pwede suno sa pulis.
Sang pag left turn, nabungguan ini sang motorsiklo sang mag live in partner.
Sila ang gindala na sa ospital. Nag angkun man sang minor injury ang isa ka menor de edad nga sakay sa jeep.
Sa Barangay Bata kagab-i, napilasan man ang naga maneho sang SUV matapos maka bunggo sa poste sa dalan atubang sang Santa Clara Subdivision sa Bacolod.
Naglain ang pamatyag sang driver suno sa pulis amo nga naka bunggo ini sa poste sa kilid sang dalan. Siya ang gindala naman sa ospital.