Shadow

Ginreklamo nga ginapatukod nga cellsite talakayon sa SP sang Bacolod

Pagatalakayon sang Sangguniang Panlungsod sang Bacolod ang ginatukod nga cellsite sang isa ka telecommunications company sa Barangay Alijis nga ginpa untat sang Office of the Building Official sang nagligad nga semana bangud sang kakulang sang permit.

Suno kay Vice Mayor El Cid Familiaran, bisan may yara na sang joint memorandum circular nga nagapahanugot sa pagtukod sang shared passive telecommunications tower infrastructure, luyag sa gihapon sang SP nga masiguro nga nasunod sang telco ang tanan nga requirements sa pagpatukod sang cellsite tower sini sa Purok Himaya, Barangay Alijis.

Sang Pebrero dise sais ginpapanaugan sang OBO sang first notice of violation ang telco matapos mahibaluan nga wala pa ini sang building permit.

Ini matapos nga ginreklamo man sang mga pumuluyo sa lugar ang construction sang cell site kag ginpadangat man ang issue sa SP.

Ginapamalabagan sang mga pumuluyo ang pagtukod sang cellsite sa ila nga lugar bangud ila gina alegar nga wala sang natabo nga public consultation sa ila nga mga residente kag nagakahangawa sila sa epekto sang cellsite sa ila ikaayong lawas.

Ginpahayag ni familiaran nga ila anay pamati-an ang sentimiento sang mga residente kag pati man ang tagdumalahan sang telco agud maklaruhan sang madason nga tikang sang siudad.

Leave a Reply

Your email address will not be published. Required fields are marked *

Secured By miniOrangeSecured By miniOrange