84-anyos nga lola patay sang masunog ang ila balay sa Kabankalan City
Na-trap ang 84-anyos nga lola sa iya kwarto sa ikaduha nga panalgan sang ila nagakasunog nga balay sa Ruiz Subdivision, Purok 6 sa Barangay Talubangi, Kabankalan City Miyerkules sang gab-i.
Nag-ibwal ang kalayo pasado las 8 sang gab-i.
Bangud may edad kag maluya na, wala makahingagaw gwa sa iya balay si alyas “Adelfa” kag pati siya ang nasunog. Ang iya mga kaupdanan sa balay ang yara sa idalum nga panalgan.
Gintinguhaan sang iya pamilya nga salbaron ang tigulang apang tuman na gid kadako sang kalayo sa balay nga himo sa kahoy.
Naglawig sang tatlo ka oras ang fire fighting operation kag tigayon nga nakadeklarar sang fire out las 11:23 sang gab-i.
Ginsiling ni Fire Officer 3 Alfie Gravela, chief arson investigator sang Kabankalan BFP, may kabudlayan sila sa pagpalong sang sunog bangud naga re-ignite ang kalayo, ilabi na mga kahoy nga materyales sang balay.
Totally burned ang balay kag yara sa ginabulubanta P450,000 ang damages sang sunog.
Base sa inisyal nga imbestigasyon, nagsugod ang sunog sa isa ka kwarto sa idalum nga panalgan sang balay.
Under investigation pa ang ginhalinan sang sunog.
Magluwas sa tigulang, wala sang nasamaran sa insidente.*
[sibwp_form id=1]