Shadow

Local player nagbukas sang pinaka una nga Negros Occidental branch sang ila gas station sa Brgy. Ma-ao sa Bago

Daw halos isa na ka banwa ukon siudad ang Barangay Ma-ao sa Bago City. Progresibo nga barangay kag alagyan padulong sa mga popular karon nga mga tourist destinations, diri man nahamtang ang Buenos Aires, alagyan pakadto sa barangay mailum, kag may lusot man sa Sitio Guintubdan, Barangay Araal sang La Carlota City.

Isa ini sa mga rason kun ngaa napili sang A and P Asia nga magbukas sang ika tatlo nila nga branch sa isla sang Negros sa sini nga barangay. Ang duha nila ka mga branch yara sa Bais City kag Mabinay sa Negros Oriental.

Ang mga tag-iya diri na nagdako sa Negros Occidental gani luyag nila nga mag branch out diri. Suno sa presidente sang kumpanya nga si Mariel Montenegro-Magno sadto pa nila handum maka branch diri kag subong lang natagaan sang chansa nga matigayon.

Kag ang napili nila nga lugar, ang Crossing Mining sa Barangay Ma-ao kay alagyan man sang mga naga pa south nga naga likaw sa traffic sa main highway.

Si Punong Barangay Jovito Gahaton, ginkalipay ang pagbukas sang sini nga gas station sa ila nga barangay. Suno sa iya maga dala ini sang dugang nga trabaho sa ila nga mga pumuluyo kag maga dugang pa gid sa pag uswag sang barangay. Sa pihak kuno sang pandemic, naga pakita lamang ang pagbukas sang J&P Asia nga padayon ang development sa Ma-ao.

Sang Biyernes ginpatigayon ang opening kag blessing sang gas station.

Para pang pa bwenas, ang punong barangay mismo ang una nga nagpa tughong.

Sa subong, padayon pa gid ang construction sang isa ka mini grocery sa kilid sini.

Pagbukas pa lang, ginpilahan gilayon ang gas station nga naga panindugan nga sila ang gasolinahan para sa tanan.

Secured By miniOrangeSecured By miniOrange