P2.414 billion palang ukon 57.88 percent sang 4.171 billion pesos nga loan sang siudad sa idalum sang administrasyon ni anay Mayor Alfredo Abelardo Benitez ang na release sang Development Bank of the Philippines as of September 30, 2026.
Ini ang sandig sa Partial Joint Committee Report sang ginapatigayon nga Comprehensive Review sang Sangguniang Panlungsod tuhoy sa mga loans sang siudad sa idalum sang administrasyon ni anay Mayor Bing Leonardia kag anay Mayor Benitez.
Suno kay Councilor Jude Thaddeus Sayson, pamuno sang Committee on Finance, may 1.757 billion pesos pa nga loan ang wala ma release sa siudad kag ini ang isa sa importante nga bagay agud maklarohan ang diskusyon sang publiko may angut samga proyekto sang siudad nga gikan sa loan.
Dugang pa niya, may mga proyekto na nga nahuman samtang ang iban padayon pa nga ginakaayo.
Ang loan ang gintalana sa 17 ka mga development projects kaangay sang land acquisition, civic buildings, pagkaayo sang mga dalan, drainage, healthcare, environmental sustainability, kag iban pa nga mga public facilities.
Damlag pa, ginsiling ni Bacolod City Mayor Greg Gasataya nga halos tapos na ang 30.8 million pesos nga motor pool sa Reclamation Area kag ang 67.9 million pesos nga City Warehouse. Lakip pa sa mga proyekto sa idalum sang loan amo ang 280 million nga City Health Complex nga pwede naman magamit sang CHO suno sa alkalde.
Samtang sandig sa report sang SP, 51.19 percent palang nga nahuman ang 765 million nga legislative building samtang yara nasa 48.68 percent ang completion rate sang 413 million pesos nga pagkaayo sang old city hall.
Nagpasalig man ang SP nga ila padayunon nga ireview ang status sang loan projects kag handa man sila nga ipakita ini sa publiko kun kumpleto na ang mga dokumento.
[sibwp_form id=1]