Paagi sa resolution number 2026-01, ginahingyo sang Liga ng mga Barangay sa Bacolod City ang Bacolod Transport and Traffic Management Department ukon BTTMD nga untaton anay ang pagpanakop sang mga electric bikes nga nagabyahe sa dalan.
Ini bangud suno sa ila, padayon pa nga gina-usisa sang Sanguniang Panlungsod ang ordinansa sang siudad nga naga-regulate sang mga Public Utility Vehicle sa siudad.
May mga ordinansa man ang mga barangay nga nagahatag sang permit sa mga e-bikes, apang wala pa sang pat-od nga regulasyon ang siudad para diri.
Paagi man sa isa ka sulat, nagsabat ang BTTMD nga wala sila sang otoridad nga untaton ang pagpanakop bangud sandig sa layi, indi pwede ang mga e-bikes nga magpasakay sang pasahero.
Ginahaylo naman ni Bacolod City Mayor Greg Gasataya ang Sangguniang Panlungsod nga gihu-on na ang pagtuon sa pag-ammend sang existing nga ordinansa para ma regulate na ang mga e-bikes sa Bacolod.
Suno sa iya, indi makahatag sang business permit ang siudad sa mga e-bikes samtang wala pa sila sang prangkisa.
Samtang wala pa sang pagbaylo sang ordinansa, magapadayon sa gihapon ang pagpanakop sang BTTMD sang mga e-bikes nga nagapasakay sang pasahero.
Sa rekord sang BTTMD, indi magnubo sa 126 ka mga e-bikes ang tigayon na nga gin-tow sa bulan lamang sang Hunyo.
[sibwp_form id=1]