![](https://i0.wp.com/digicastnegros.com/wp-content/uploads/2023/09/image-224.png?resize=810%2C456&ssl=1)
Isa ka licensed teacher nga gusto kuntani mangin katapo sang Philippine Coast Guard ang nagpadulong sa National Bureau of Investigation kaina sang aga agudto maghinyo man sang bulig.Ini matapos mabiktima sang scam angut sa pag pang recruit para sa PNP.
May 121,000 pesos ang kabilugan nga na pa gwa nga kwarta sang aton ihinago sa ngalan nga Rina para sa pag process sang iya nga application kag pagsulod mismo sa Philippine Coast Guard.
Taga La Castellana man siya pero ang iya nga transaction natabo na sa Bacolod sadtong June tubtob July sini nga tuig. Sang nagligad nga semana, nag gwa man ang pila ka mga tagreklamo.
Suno kay Major Nelson Amsiwen, Jr., ang OIC sang La Castellana PNP, gin report sang mga tagreklamo sanday La Castellana Councilor Donato Dumaguit alias Nat-Nat kag ang isa nga ginkilala kay Mary Jun Tagua Delos Santos nga nag tanyag sa pag facilitate sang ila nga application sa PNP nga may kabaylo nga bayad.
Sa interview sang XFM sa konsehal iya sini ginsiling nga ang issue batuk sa iya may lamod pulitika.
Gintinguhaan naman sang Digicast Negros nga malab-ot si Delos Santos paagi sa text pero wala siya nagasabat. Wala man siya naga sabat sa tawag sang media.
Naga laum si Rina nga kuntani mabawi ang gin pa gwa nga kwarta labi na gin prenda pa sang iya nga amay ang ila nga uma sa handom nga matigayon ang iya nga pagsulod sa Coast Guard. Mas nagasalig siya sa NBI suno sa iya labi na ang gina reklamo niya gina alegar may mga contact man mismo sa PNP.
Ang gobyerno probinsyal ang maga bulig man sa mga complainant sa ila nga pag execute sang affidavit sa La Carlota Prosecutor’s Office.
Gina paabot ang pormal nga pag pasaka sang reklamo angut sa minilyon nga pesos nga recruitment scam batuk sa duha sini nga semana.