Padayon pa nga ginapangita sang Talisay City PNP ang pamilya sang napatay nga lalaki sa isa ka subdivision sa Barangay Zone 15, Talisay City sadtong Martes sang kaagahon.
Ginsiling ni Police Lt. Col. Salvador Trono Jr., hepe sang Talisay PNP may impormasyon sila nga nabaton angot sa identity sang lalaki apang tubtob karon ila pa ini nga gina-confirm.
Nag pagwa ang PNP sang mga litrato sang lalaki, kun diin makita ang pila sini ka mga tattoo sa lawas, agod makabulig sa pagkilala sa iya.
Nagsulod ang lalaki upod ang isa pa gid ka persona sa subdivision kag sila ang nakit-an sang mga security guards nga naga tinghua magsulod sa isa ka balay, rason nga sila ang ginlagas.
Nakapalagyo ang upod apang nadakop sang mga sekyu ang lalaki kag ila siya ginposasan.
Pag-abot sang rescue, gindeklarar ang lalaki nga wala na sang kabuhi.
Suno sa hepe, wala sang entry wounds ukon ano man nga pilas ang lalaki base sa ila initial assessment.
Ugaling, indi pa mapaidalom ang lalaki sa autopsy agud mahibaluan kuntani ang gintunaan sang iya kamatayon, bangod kinahanglan pa sang consent sang iya pamilya.
[sibwp_form id=1]