May sampaw nga bayo nga posible iya pa sang sakristan ang lalaki nga gintudlo nagpangawat sa simbahan, sang siya ang nadakpan sa buy-bust operation sa Progreso, Barangay Alijis sa Bacolod City sang Domingo sang gab-i, Hulyo 12.
Ginsiling ni Police Capt. Jay-r Reyes, hepe sang Station 7 nga nag-match ang tattoo kag profile ni alyas “Alog”, 28-anyos, sa suspek nga nakuhaan sang closed-circuit television camera footages sang simbahan.
Sa ginpatigayon nga custodial debriefing matapos madakpan si alyas “Alog” sa buy-bust, iya man gin-ako nga siya kag ang iya duha ka mga lookout ang nagpangawat sa kombento kag simbahan sang St. Jude Thaddeus Parish and Shrine sa Brgy. Alijis sadtong Hulyo 8.
Nakawat sang mga suspek ang pila ka mga pagkabutang kag masobra P300,000 nga cash nga bag-o lang na-withdraw sa bangko agud kuntani pambayad sa mga balayran sang simbahan, ipakay-o sang tiles sa altar, kag budget sa subong nga bulan.
Suno kay alyas “Alog”, ila na nga natunga-tunga kag nagasto ang kwarta.
[sibwp_form id=1]