Matapos ang duha ka tuig, nakuha sang napatay nga Siberian Husky nga si Skittles ang hustisya sa pagtiro sa iya sang ila kaingod balay sa Bacolod City.
Sa post sang Community Animal Rescue Efforts ukon CARE Incorporated, ginpakita ang desisyon sang Korte nga guilty si Dominador Bangero Jr. sa criminal case nga pagsupak sa Section 6 sang Republic Act 8485 ukon ang Animal Welfare Act of 1998, as amended by R.A. 10631.
May sentensya ini nga pagkapriso sang indeterminate term nga indi magnubo sa isa ka tuig, siyam ka bulan kag isa ka adlaw tubtob duha ka tuig.
Sadtong Pebrero 2023 sang gintiro ni Bangero si Skittles sa isa ka subdivision sa Brgy. Singcang-Airport. Nagtaliwan ang ido matapos ang pila ka oras samtang ginabulong sa veterinary clinic.
Nagpasalamat ang CARES Inc. sa tanan nga nagbulig agud pamatukan ang animal cruelty kag mahatagan sang hustisya si Skittles.
Indi man mahapos ang inagyan sang mga katapo sang animal group apang suno sa ila, ginhimo nila ini para kay Skittles kag sa tanan nga mga kasapatan nga indi makahambal agud mahatagan sila sang hustisya.*