Lalaki nga ginreklamo sang menor de edad nga nanghikap sang dughan nagpalapit na sa pulis para magpaathag. Ginkumpirma ni Police Major Elmer Bonilla, hepe sang Police Station 1, nga nagpadulong kahapon sa ila istasyon ang lalaki sa litrato nga ginreklamo sang 16 anyos nga naghikap sa iya nga dughan.
Nakatupad sang menor de edad ang lalaki sa front seat sang jeep padulong sa Barangay Taculing sa Bacolod kag suno sa biktima, siko lang una sang lalaki ang naga igo sa iya dughan.
Pero dugay-dugay nabatyagan niya nga ginahikap na sini ang iya nga dughan. Gilayon nanaog ang lalaki sa jeep.
Base sa iya panugiron sa pulis, wala niya kuno ginhungod nga mahikapan ang dughan sang menor de edad pero pasakaan siya sa gihapon sang kaso nga acts of lasciviousness in relation to child abuse.