Shadow

Korte nagpapanuag sang temporary restraining order sa tuyo sang sra nga mag import sang kalamay

Gin-serbe na ang temporary restraining order nga ginhinyo sang United Sugar Producers Federation sa Branch 73 sang Regional Trial Court sa Sagay City batuk sa Sugar Order No. 3 nga gin-issue sang Sugar Regulatory Administration may angut sa pag-import sang 200,000 metric tons sang kalamay.

Magalawig sa 20 days ang tro kag sa pebrero 24 natalana ang hearing sa tunga sang UNIFED kag SRA.
Ginalauman sang mga opisyales sang UNIFED nga mapunggan ang sugar importation agud mapangapinan ang sugar industry.

Nagapati ang grupo nga kun matigayon ang sugar importation maapektuhan ang malapit nubenta porsyento sang mga agrarian beneficiaries nga sugar planters ilabi na karon nga halos triple na ang ginsaka sang presyo sang abono kag masobra na sa napulo ka pesos ang ginsaka sa presyo sang produkto petrolyo humalin sang nagligad nga bulan.

Ang sugar importation ang gindihon sang sra sa tuyo nga mapahagan-hagan ang pagsaka sang presyo sang kalamay epekto man sang pagsaka sang presyo san abono.

Ginklaro naman sang grupo nga wala nila ginabalagan ang pag-import sang kalamay pero indi ini ang ensakto nga tion para mag-import sang kalamay nga ang ginpili nga end user amo lamang ang mga industrial users kasubong sang mga bottling company.

Si anay provincial board member Gary Acuna nagpahayag man nga handa siya mag-upod sa liwat nga pag-boycott sa isa kabottling company kun matigayon ang pag-import sang kalamay.

Ginhinyo naman sang grupo kay Presidente Rodrigo Duterte ang pagpahalin kay SRA Administrator Hermenegildo Serafica nga anay katapo man sang UNIFED.

Sa text message ginpahayag ni Serafica nga magasunod sila sa mandu sang korte samtang pending man ang kaso may angut sa issuance sang injunction batuk sa gin isyu nga Sugar Order no 3.

Nagalaum ang unifed nga sa pagpatuman sang expanded fertilizer subsidy, makatibawas ang sugar industry sa epekto sang pagsaka sa presyo sang farm inputs.

Secured By miniOrangeSecured By miniOrange