Nagtanyag sang P50,000 nga reward ang tag-iya sang RGBT Game Farm sa Purok Bonifacio, Barangay Mailum sa Bago City sa makatudlo sa nagkawat sang 30 sini ka mga seed fowl nga inugbulang nga manok sadtong Agosto 8.
Ginabulubanta P750,000 ang balor sang nadula nga mga manok, nga nagagulang sang anum tubtob walo ka bulan.
Nagapati ang tag-iya nga sa katubohan nag-agi ang mga kawatan kag ginkuha ang mga manok nga nakahigot.
Ang mga nadula nga game fowl ang may naka-attach nga Local Green Wing Band kag National Yellow Wing Band, nga pagadal-on kuntani sa Expo sa Cebu sini nga Oktubre.
Samtang, lima naman ka inugbulang nga manok nga ginakondisyon sang tag-iya ang ginkawat sa plaza sang Barangay Ani-e sa banwa sang Calatrava, sang Agosto 12.
Suno kay Michael Legaspi, pinakauna ini nga beses sa sulod sang 16 ka tuig nga nakawatan siya sang manok nga iya ginabutang malapit sa plaza.
Iya ginakondisyon ang manok agod kuntani nga i-derby.
Nagtanyag si Michael nga magahatag sang reward nga insakto para sa isa ka lechon baboy kag isa ka kaha sang beer, sa makabalik sang iya mga manok ukon makahatag impormasyon sa nagkawat sini.
Sa karon, padayon pa ang imbestigasyon sang kapulisan sa insidente.
[sibwp_form id=1]