Nakuhaan sang video sang isa ka concerned citizen ang pagbalik sang isa ka traffic enforcer sang kwarta nga suhol kuntani sa iya sang isa ka taxi driver agud indi na ini pag tiketan.
Ginbutang pa sang drayber ang gina alegar 100 pesos bill sa babaw sang salakayan, apang ginkuha ini sang enforcer kag ginbalik sa drayber. Natabo ang insidente malapit lang mismo sa Bacolod City Government Center.
Ginkilala ang traffic enforcer nga si Raymus Tingson, 57 anyos kag isa ka Job Order Employee sang siudad.
Kilala na si Tingson bilang isa ka honest nga traffic enforcer. Damlag pa, ginpasidunggan man siya sang siudad bangud sa iya pag-uli sang nadula nga kahita sang isa ka barista nga may unod sang kapin 11,000 pesos nga cash.
Sa flag ceremony Lunes sang aga, apisar nga wala si Tingson makapadulong sa BCGC, ginpasidunggan siya ni Bacolod City Mayor Greg Gasataya.
Suno sa alkalde duha na katuig nga nangin JO sang siudad ang natungdan nga empleyado kag ginpatawag na niya ini agud maistorya sa posible nga mas dako nga oportunidad nga itanyag sang LGU.
Magluwas sa honesty, ginapa-assess man sa BTTMD ang performance ni Tingson. Dugang sang alkalde, priority sang siudad nga ma regular una ang mga dumaan na nga traffic enforcers kag ang may mga maayo nga performance.
Gin-ako man sang alkalde nga may mga traffic enforcers gid man nga gina reklamo bangud sa ginapatihan nga pagbaton sang suhol, apang suno sa iya ang gin obra ni Tingson ang nagapamatuod nga may yara sang mga maayo kag honest nga nga enforcers sa dalan sang Bacolod.
[sibwp_form id=1]