Makita sa video ni Marvie Faburada, ang kabudlay sa pagkarga sang isa ka benepisyaryo sang UPLIFT ukon Unified Package for Livelihoods, Industry, Food and Transport sa Sitio Lag-it, Barangay Bi-ao sa banwa sang Binalbagan, Negros Occidental.
Gintuwangan sang mga pumuluyo ang benepisyaryo nga indi na makasarang nga makalakat agod nga maka-attend sa orientation kag makabaton sang ayuda.
Duha ka mga lalaki ang nagapas-an sa magtimbang nga bahin sang pusog sang kawayan, kun diin naka-angot ang duyan nga ginkargahan sang benepisyaryo.
Sa idalom sang UPLIFT program sang gobyerno, ang mga benepisyaryo ang makabaton sang bulanan nga tig-P2000 nga ayuda sa sulod sang anum ka bulan, humalin Hulyo tubtob Disyembre sini nga tuig.
Ang Department of Social Welfare and Development amo ang naga-administer sang nasambit nga programa.
Ginsiling ni DSWD-Negros Island Region regional director Arwin Razo, ila pa nga usisaon ang natabo sa nasambit nga benepisyaryo sa Binalbagan.
Suno kay Razo, personal nga ginapakadtuan nila sa ila staff ang mga benepisyaryo nga bed ridden, may mga masakit kag wala na sang ikasarang nga makakadto sa payout, agod nga mahatag ang assistance.
“Kami naman ang ginagawa namin kapag ka bed-ridden or sickly, pinapapuntahan ko yan just like what you have seen in our posts, even sa detention facility pinapapuntahan ko”, suno kay Razo.
[sibwp_form id=1]