Ang La Castellana Incident Management Team ang naga panawagan sang gilayon nga dredging para sa Bagacay Creek kag Tamburong Creek sa Biak na Bato.
Napuno ang natungdan nga mga creek sang nagtig-a nga lahar suno sa DENR. Ang sadto anay nagadalom sang mga anum ka metro nga mga sapa ang halos nag tapan na.
Ang mga residente nga naga puyo malapit sa sini nga mga area ang naga pangatubang sang risgo labi na kun mag bubo ang ulan. Daku ang posibibilidad sang pag baha.
Damlag pa nag hinyo na paagi sa isa ka resolution ang pamuno sang DENR NIR OIC Charlie Fabre sang clearance gikan sa Tiglikum sang DENR nga matugutan ang dredging sang mga creek nga wala naman sang hauling sang mga material nga ipatuman.
Ini nga mga area ang sakop sang protected area sang Mt Kanlaon Natural Park.
Kuntani gina lauman sang IMT nga sa mas madali nga panahon mapatuman na ang dredging sa mga area.
Suno kay Biak na Bato Punong Barangay Joselito Martinez, Jr., malapad ang sarang ma apektuhan sang barado nga Tamburong creek. Sarang man gani malambot suno sa iya ang kaiping nga barangay sang Cabacungan enkaso nga may pag baha.
Sa bahin ni Negros Occidental Governor Eugenio Jose Lacson ipatuhoy niya ang concern sa PEMO para mapat-od kun ano ang sarang mabuhat para diri para mapadasig ang ipatuman nga tikang.
“Ang suba nag nubo na gid. Unlike sang una ang suba kun lantawon mo tag tunga sa nayon ang kaason halin sa babaw padalom subong nagtapan na gid. Kun lantawon mo daw nag super highway na. Nag nubo na. Amo na problema namon subong nga dapat ma clearing”, suno kay Martinez.