Karon nga natapos na ang swab testing sang mga market vendors sa siudad, tuyo sang Bacolod Emergency Operations Center nga ipaidalum man sa surveillance testing ang iban pa nga mga sektor bilang pagpanghanda sa pag-downgrade sang siudad sa modified general community quarantine.
Suno sa executive director sang Bacolod EOC nga si City Administrator Em Ang, plano nila nga unahon nga ipaidalum sa swab test ang mga health care workers.
“Unahon ta siguro ang aton mga health care workers kay sila gid na ya ang exposed every single day, exposed sila sa aton nga mga isolation facilities, for example our quarantine facilities, those who are working in our BRO center and other areas sa City Health, our BHERTS,” suno kay Ang.
Ipaidalum man sa libre kag voluntary nga RT-PCR test ang mga driver sang mga pampubliko nga salakyan. Ini agud masiguro nga indi man malatnan sang virus ang ila mga pasahero kun sila ang magbiyahe.
Plano man sang EOC nga ipaidalum sa swab test ang mga nagatrabaho sa mga lugar nga ginakadtuan sang madamo nga mga pumuluyo.
“In our desire to open the economy we have to ensure nga safe ang aton nga tawo, safe ang pumuluyo, safe ang mga workers nga magbalik full time sa ila nga mga trabaho,” suno kay Ang.
Ginapaabot man sang EOC nga ma-downgrade na ang status sang Bacolod pakadto sa modified general community quarantine matapos magpadala sang sulat si Bacolod Mayor Evelio Leonardia sa National IATF nga manubo na ang mga kaso sang COVID-19 sa siudad.