Shadow

Child psychiatrist: Kinahanglan nga nakahibalo ang mga ginikanan kun paano ipagamit sang husto ang mga gadgets sa ila kabataan

Sandig sa pagtuon, ang mga kabataan nga nagalantaw sang TV ukon naga atubang sa gadget sang cmasobra sa duha ka oras kada adlaw ang may negatibo nga epekto sa ila thinking kag language skills.

Gani para sa child psychiatrist nga si Dr. Jocelyn Gayares, dapat nakahibalo ang mga ginikanan sang husto nga paggamit sang mga kabataan sang gadget sa ila nga pagtuon.

Para indi maguba ang ila mga mata, sundon ang ginatawag nga 20-20-20 rule.

“Kada 20 ka minutos nga ara sila sa ila nga gadget sa online man na nila nga pag eskwela, kakson gid ang ila mga mata or papahuwayon ang ila mga mata for 20 seconds kag mag tan-aw anay sa malayo, 20 meters away, bag-o nila liwat ibalik ang ila mga mata sa ila nga mga screen or sa pagtan-aw sa ila mga teacher nga nagatudlo online,” suno kay Gayares.

Dapat man nga likawan ang pagpungko sang malawig nga inoras samtang nagagamit sang mga gadget.

Indi man dapat maglapaw sa isa ka oras kada adlaw ang paghampang sang mga kabataan sang ginatawan nga electronic games.

Para naman sa mga bata nga naga edad pito ka tuig panubo, dapat nga modular learning ang ila pamaagi sa pagtuon kag wala nagagamit sang gadget.

“Kamo nga mga ginikanan ti tudlu-an ninyo ang inyo mga kabataan or pwede man nga mangayo sang bulig kay teacher kay kung 7 anyos papanaug te ano pa man lang ni, nursery, kinder, prep, grade 1 ti kayang kaya na ni nanay kag ni tatay,” suno kay Gayares.

Kag karon nga may yara sang pandemya, importante ang pagtenir sa sulod sang panimalay kag pag bonding sa pamilya agud nga mangin mentally kag emotionally stable indi lamang ang kabataan kundi ang bug-os nga pamilya.

Secured By miniOrangeSecured By miniOrange