Governor Eugenio Jose Lacson ang personal pa nga maga istorya kay Provincial Administrator Rayfrando Diaz angut sa suspension order nga nabaton sini.
Suno sa gobernador nagapati siya nga wala sang may nahimo nga sala ang provincial administrator.
Gina paabot ang pag file sang motion for reconsideration ni Diaz sa anum ka bulan nga suspension order nga ginpapanaog sa iya sang Office of the Ombudsman bangud sang conflict of interest.
Suno kay Lacson iya pa nga igatalakay kay Diaz kun ano ang mga legal options nga nabilin.
Ginsiling kahapon ni Diaz nga iya pagahulaton ang mangin desisyon sang gobernador.
“The way I understand it, nothing is final yet. I will talk. I also personally believe he has done nothing wrong and I am not a lawyer but I have to ask him what are the legal options still left”, suno kay Lacson.
Upod ni Diaz nga ginpapanaugan sang suspension order si Atty Chery Sheil Valenzuela, Executive Assistant II.
Ginreklamo ang ila kapaslawan sa paghatag sang legal assistance sa Binalbagan sa expropriation case nga gin-file sang banwa.
Gina siling sa reklamo ni Atty Roxenne Sumanting nga may yara sang conflict of interest bangud sila nga duha ang nag-appear bilang legal counsel sang JLL Agriculture and Development nga isa sa mga defendant sa amo nga expropriation case.
Naga panindugan si Diaz nga wala nabutang sa disebentahan ang Binalbagan bangud gintanyag sang kumbuyahan nga ila gintiglawas ang amicable settlement.
Natabo ini sang tion pa sang transition period suno kay Diaz.