Tatlo ka mga department heads sang Bacolod ginpasakaan kaso sang anay konsehal pati na ang City Fire Marshall tungod sang illegal structures nga wala makakas sa atubang sang iya propiedad.
Kaso kriminal kag administratibo angut sa pagsupak sang Anti-Graft and Corrupt Practices Act, grave abuse of authority, grave misconduct and dereliction of duty ang ginpasaka ni anay konsehal Ricardo Cano Tan batuk sanday Business Permits and Licensing Office head Stella Marie Rayos, City Health Officer Dr. Carmela Gensoli kag Sanitation Inspector Mericar Ana Parreno kag Office of the Building Official head Engr. Isidro Sun.
Ginlakip man sa kaso sanday City Fire Marshal F/CInsp Stephen Jardeleza kag SFO2 Myron Gallo, Chief sang Fire Safety Enforcement Section sang Bacolod Bureau of Fire Protection – Bacolod.
Ini ang may kaangtanan sa iya ginsiling paghatag sang permit sa baligyaan sang litson sa iya nabakal nga propiedad sa Burgos Extension sa Barangay Villamonte.
Ginsiling ni Tan tubtob karon wala maaksyonan sang mga natungdan ang iya reklamo batuk sa ginakabig illegal structures sa road lots nga yara lang sa atubangan sang iya propiedad.
Ginpahayag ni City legal Officer Atty. Romeo Carlos Ting, Jr., nga wala sang na-issue nga permit ang siudad sang 2024 agud maka-operate ang ginareklamo nga baligyaan lechon.
Nakahanda ang CLO nga ini ang aksyonan.
Si Jardeleza ang maga-issue sang komento sa tion nga mabaton na ang kopya sang reklamo sang anay konsehal.
As of press time, wala pa nakasabat sa text kag tawag ang iban pa nga respondent sa kaso.