Yara na sa tagsa ka LGU kag sa mga alkalde kun luyag nila nga pondohan ang ginaduso nga massive aerial spraying kontra sa RSSI. Ini suno kay Governor Eugenio Jose Lacson nga nagklaro nga kun nag “go green” ang probisya wala man nagakasayuran nga naga pamatuk sila sa aerial chemical spraying.
Sang nagligad nga semana ginsiling ni SRA administrator Pablo Luis Azcona nga gina respeto nila ang panindugan sang probisya nga mag gamit sang biological control sa away kontra RSSI.
Pero suno kay Azcona, madugay ang ini nga proseso kag sa dalagan sang infestation sang RSSI sa katubuhan kinahanglan ang gilayon nga aksyon kaangay sang chemical spraying para matapna na ang pag lapta pa gid.
Bilang reaksyon suno sa gobernador, ginsiling niya man nga indi mag hatag sang pondo ang probinsya para sa gina duso nga aerial spraying sang chemical, wala man naga kasayuran nga gina pamatukan nila ini.
Ang kontribusyon sang probinsya amo ang pag patuman sang biological control. Suno kay Lacson yara na sa ikatlo nga semana ang probinsya sa game plan sini kontra sa RSSI kag Miyerkules maga sugod sila sang spraying gamit ang biological control.
Dugang pa ni Lacson natunga ang opinyon sa away kontra RSSI. May mga grupo nga naga panawagan sang massive chemical spraying kag may mga grupo naman nga naga suporta gani sang tikang sang probinsya ang pag gamit sang natural means.
Gani yara na sa mga alkalde kun mag pain sila sang pondo sa gina duso nga chemical spraying gamit ang mga eroplano.
[sibwp_form id=1]