Ginserbehan na sang show cause order sang Martes, Hulyo 21, ang isa ka lalaki nga regular employee sang Bacolod City Treasurer’s Office bangud sa gina alegar irregular nga pagkolekta sang amusement tax sa pila ka mga ilimnan sa Bacolod City.
Ginsiling ni Atty. Vanessa Encabo, spokesperson sang City Legal Office, nga may duha ka mga bar sa Bacolod ang nagpasaka sang parehos nga reklamo batuk sa natungdan nga empleyado.
Sandig sa pagpang-usisa sang CLO, nagdangat sa 8,500 pesos ang nakolekta sang empleyado sa duha ka ilimnan, apang wala man ini sang may ginahatag nga resibo.
Ginatan-aw pa sa karun sang CLO ang record sang Treasurer’s Office agud matumod kun gina-remit gid man sang natungdan ang iya mga ginakolekta ukon wala.
Natabo ang insidente sang Disyembre sang tinalikdan nga tuig.
Dugang ni Encabo, isa pagid sa mga reklamo sang mga bar owners amo ang pagsukot sang empleyado sang amusement tax sa ila bisan wala man sila aktibidad nga ginhiwat sa amo nga tion.
Suno kay Encabo, obligado lamang ang mga establisimiento nga magbayad sang amusement tax fee kun may aktibidad sila nga ginhiwat.
Ginhatagan na sang CLO sang lima ka adlaw ang natungdan agud maghatag sang iya bahin.
Sang tinalikdan nga semana, may isa pa gid ka empleyado sang City Legal Office ang ginpapanaugan man sang show cause order bangud wala nag bayad sang iya ginpang order kag nangli-ab pa sang empleyado sang ilimnan samtang nagapakilala nga empleyado sang CLO.
[sibwp_form id=1]