Nagbinuligay ang mga pumuluyo agod malagas kag madakop ang gin-alegar kawatan sang motorsiklo sa Barangay Singcang-Airport, Bacolod City.
Ginsiling ni Police Major Rondyl Tapang, hepe sang Police Station 8 nga nagpalimpyo sang throttle ang tag-iya sang Honda Click nga motor sang ini ang ginsakyan sang lalaki kag ginpalagyo.
Naka-angot ang yabe sa motor, rason nga napa-andar ini sang lalaki, suno sa hepe.
Dali-dali man nga nagsakay ang mekaniko sa iya motor kag ila ginlagas ang lalaki halin sa dalan Magsaysay pasulod sa J.R. Torres Avenue.
Sa bulig sang mga bystanders kag pumuluyo, nadakpan ang suspek kag narekober sa iya ang motor.
Gindala sa Police Station 8 ang 26-anyos nga lalaki, residente sang Barangay Handumanan sa Bacolod kag siya ang pasakaan sang kaso nga carnapping.
“Ginsakyan kay nalimtan abi nga ang yabe wala makuha, opportunity gid. Diri siya maliko tani sa Old Airport nga dalan palusot diri pagwa sa Araneta kag luckily maayo kay nadakpan,” pahayag ni Major Tapang.*
[sibwp_form id=1]