Pwede ka na mangin kabahin sang pangpanag-iya sang GCash paagi sang pagbakal shares nga ang bili P6.60 ang isa.
Ini ang ginpahibalo sang Mynt Inc., ang parent company sang GCash, matapos makompleto proseso sang pagtipon sang mga order halin sa institutional investors antes sang initial public offering (IPO) sini.
Nagahatag ang IPO sang oportunidad sa publiko nga magbakal sang shares kag mangin kabahin sang mga tag-iya sang negosyo. Mahimo magsaka ukon magnubo ang bili sang shares kon magsugod na ang trading.
Magabalor sang mga P53 bilyon ang kabug-usan nga pagtanyag sang 8,027,409,600 ka common shares sa presyo nga P6.60 kada share, suno sa Mynt.
Gani, kung gusto magbakal 100 shares, pwede mo lang ini makuha sa P660 nga presyo.
Mahimo ini maglab-ot sa mga P60.9 bilyon kon magamit sing bug-os ang opsyon nga magbaligya sang tubtob 1,204,111,400 ka dugang nga shares nga ginapanag-iyahan sang mga existing nga shareholder.
Ginsiling sang Mynt nga mangin pinakadaku ini nga IPO sa kasaysayan sang Pilipinas kon matuman.
Dugang pa sang Mynt nga mas mataas ang demand sang ila institutional order-gathering sang sa mga available nga shares nga gin-intrahan man sang mga dalagko nga mga investors mapa-lokal man kag international.
Nagatuhoy ini sa demand sang mga dalagku nga investors sa proseso sang pag-presyo apang indi ini garantiya nga mabaton sang tagsa ka indibidwal nga aplikante ang tanan nga shares nga ila ginapangayo.
Siling ni Evelyn Ng, chief finance officer sang Mynt, nga gintinguhaan sang kompanya nga mapabilin ang mahapos nga oportunidad para sa mga Pilipino nga makapartisipar samtang nagapanghanda ini nga mangin publicly listed.
Nagahatag kahigayonan ang Mynt sa mga interesado sa Bacolod kag Negros Occidental nga makaangkon sang shares sa parent company sang serbisyo nga ginagamit sa pagpadala sang kuwarta, pagbayad sang bills, kag iban pa nga transaksyon.
Nagapabilin nga presyo para sa IPO ang P6.60 kada share pero mahimo maglain ang presyo sini kon magsugod na ang pagbakal kag pagbaligya sa stock exchange.
Magadalagan ang retail offer halin Oktubre 6 tubtob 12 kag ang target nga listing sa Main Board sang Philippine Stock Exchange sa Oktubre 20, gamit ang stock symbol nga GCASH.
Magadepende pa ang iskedyul sa regulatory approvals, kahimtangan sang merkado, kag iban pa nga mga kinahanglanon.*
[sibwp_form id=1]